இலங்கை அணிக்கெதிரான இரண்டாவது இருபது-20 போட்டியில், அவுஸ்திரேலியக் கிரிக்கெட் அணி சுப்பர் ஓவரில் வெற்றி பெற்றுள்ளது.
இந்த வெற்றியின் மூலம் ஐந்து போட்டிகள் கொண்ட இருபது-20 தொடரில், 2-0 என்ற கணக்கில் அவுஸ்திரேலியக் கிரிக்கெட் அணி முன்னிலை பெற்றுள்ளது. சிட்னியில் நேற்று முன்தினம் நடைபெற்ற இப்போட்டியில், நாணயச்சுழற்சியில் வெற்றி பெற்ற இலங்கை கிரிக்கெட் அணி, முதலில் களத்தடுப்பை தீர்மானித்தது. இதன்படி முதலில் துடுப்பெடுத்தாடிய அவுஸ்திரேலியக் கிரிக்கெட் அணி, நிர்ணயிக்கப்பட்ட 20 ஓவர்கள் நிறைவில் 6 விக்கெட்டுகள் இழப்புக்கு 164 ஓட்டங்களை பெற்றுக்கொண்டது. இதனைத்தொடர்ந்து 165 என்ற வெற்றி இலக்கை நோக்கி பதிலுக்கு களமிறங்கிய இலங்கை கிரிக்கெட் அணி, நிர்ணயிக்கப்பட்ட 20 ஓவர்கள் நிறைவில் 8 விக்கெட்டுகள் இழப்புக்கு 164 ஓட்டங்களை பெற்றுக் கொண்டது. வெற்றி இலக்கு சமநிலை பெற்றதால், போட்டி சுப்பர் ஓவருக்கு நகர்ந்தது.
இதனையடுத்து சுப்பர் ஓவரில் முதலில் துடுப்பெடுத்தாடிய இலங்கை கிரிக்கெட் அணி, ஐந்து ஓட்டங்களை பெற்றுக்கொண்டது. இந்த வெற்றி இலக்கை நோக்கி பதிலுக்கு களமிறங்கிய அவுஸ்திரேலிய அணி, மூன்றாவது பந்திலேயே வெற்றி இலக்கை கடந்தது. இரு அணிகளுக்கிடையிலான மூன்றாவது இருபது-20 போட்டி, இன்று கன்பெரா மைதானத்தில் நடைபெறவுள்ளது.
