இந்தியாவுக்கான இரண்டு நாள் உத்தியோகபூர்வ விஜயத்தை முடித்துக்கொண்டு நிதி அமைச்சர் பசில் ராஜபக்ஷ நேற்று (18) நாடு திரும்பினார்.
இம்மாதம் 15ம் திகதி இந்தியா புறப்பட்ட அவர், மறுநாள் 16ம் திகதி இந்திய வெளியுறவுத்துறை செயலாளர் ஹர்ஷ் வர்தன் ஷ்ரிங்லாவை, இந்திய பிரதமர் நரேந்திர மோடியையும் சந்தித்து பேச்சுவார்த்தை மேற்கொண்டார்.
பின்னர் அவர் இந்திய வெளிவிவகார அமைச்சர் டாக்டர் எஸ். ஜெயசங்கர் இந்திய நிதியமைச்சர் நிர்மலா சீதாராமனையும் சந்தித்துப் பேச்சு வார்த்தைகளில் ஈடுபட்டார். நிதியமைச்சர் பசில் ராஜபக்ஷவிற்கும் இந்திய நிதியமைச்சர் நிர்மலா சீதாராமனுக்கும் இடையிலான சந்திப்பின் பின்னர் இந்தியாவிடமிருந்து தற்போதைய பொருளாதார ஸ்திரமற்ற தன்மைகள் பற்றிய நிலைப்பாட்டை எடுத்துக்கூறிய அவர் 1 பில்லியன் அமெரிக்க டொலர் கடன் வசதிக்கான ஒப்பந்தம் சாசனத்திலும் கையொப்பமிட்டார்.
இந்த கடன் வசதி இலங்கையில் அத்தியாவசிய மருந்துகள் மற்றும் அத்தியாவசிய உணவுப் பொருட்களை இறக்குமதி செய்ய பயன்படுத்தப்படவுள்ளது. இந்த கடனில் 75 சதவீதமான பொருட்கள், சேவைகள் இந்தியாவிடம் இருந்தும் ஏனைய 25 சதவீத கடனில் வேறு நாடுகளில்இருந்தும் பொருட்கள் சேவைகளை கொள்வனவு செய்ய முடியும் என்கிற விதத்தில் ஒப்பந்தம் கைச்சாத்திடப்பட்டது.
நிதி அமைச்சரின் இந்த விஜயத்தின் போது இரு நாடுகளுக்கும் இடையிலான இலங்கை இந்திய முதலீட்டுத்தன்மைகள் மற்றும் பொருளாதார பங்காளித்துவம் தொடர்பிலும் பல விடயங்கள் கலந்துரையாடப்பட்டன. நிதியமைச்சருடன், இந்திய மின்சாரம் மற்றும் புதுப்பிக்கத்தக்க எரிசக்தி அமைச்சர் ஸ்ரீ ராஜ்குமார் சிங் ஆகியோருக்கு இடையிலான சந்திப்பும் அமைச்சர் நாடு திரும்புதற்கு முந்தைய நாள் பிற்பகல் நடைபெற்றமை குறிப்பிடத்தக்கது.