பிக் பேஷ் ரி20 தொடரின் 17ஆவது லீக் போட்டியில், பெர்த் ஸ்கொர்சர்ஸ் அணி 21 ஓட்டங்களால் வெற்றிபெற்றுள்ளது. மெல்பேர்ன் மைதானத்தில் கடந்த புதன்கிழமை நடைபெற்ற இப்போட்டியில், பெர்த் ஸ்கொர்சர்ஸ் அணியும் மெல்பேர்ன், ரெனிகேட்ஸ் அணியும் மோதின.இப்போட்டியில் நாணய சுழற்சியில் வெற்றி பெற்ற பெர்த் ஸ்கொர்சர்ஸ் அணி முதலில் துடுப்பெடுத்தாட தீர்மானித்தது. இதன்படி முதலில் துடுப்பெடுத்தாடிய பெர்த் ஸ்கொர்சர்ஸ் அணி, நிர்ணயிக்கப்பட்ட 20 ஓவர்கள் நிறைவில் 5 விக்கெட்டுகள் இழப்புக்கு 206 ஓட்டங்களை பெற்றுக்கொண்டது. இதில் அணியின் அதிகப்பட்ச ஓட்டங்களாக, மிட்செல் மார்ஷ் 86 ஓட்டங்களையும் லோறி எவண்ஸ் ஆட்டமிழக்காது 42 ஓட்டங்களையும் பெற்றுக்கொண்டனர்.
மெல்பேர்ன் ரெனிகேட்ஸ் அணியின் பந்துவீச்சில், கேன் ரிச்சட்சன் 3 விக்கெட்டுகளையும் ஜேம்ஸ் பெட்டின்சன் மற்றும் வில் சத்தர்லேண்ட் ஆகியோர் தலா 1 விக்கெட்டினையும் வீழ்த்தினர். இதனைத்தொடர்ந்து 207 என்ற வெற்றி இலக்கை நோக்கி பதிலுக்கு களமிறங்கிய மெல்பேர்ன் ரெனிகேட்ஸ் அணியால், 20 ஓவர்கள் நிறைவில் 5 விக்கெட்டுகள் இழப்புக்கு 185 ஓட்டங்களை மட்டுமே பெற முடிந்தது. இதனால், பெர்த் ஸ்கொர்சர்ஸ் அணி 21 ஓட்டங்களால் வெற்றிபெற்றது. இதன்போது அணியின் அதிகப்பட்ச ஓட்டங்களாக, ஆரோன் பின்ஞ் 68 ஓட்டங்களையும் நிக் மெடின்ஸன் 67 ஓட்டங்களையும் பெற்றுக்கொண்டனர். பெர்த் ஸ்கொர்சர்ஸ் அணியின் பந்துவீச்சில், அஸ்டன் அகர் 2 விக்கெட்டுகளையும் ஜேஸன் பெரேண்டொர்ப், மிட்செல் மார்ஷ் மற்றும் பீட்டர் ஹட்ஸோக்லோ ஆகியோர் தலா 1 விக்கெட்டினையும் வீழ்த்தினர். இப்போட்டியின் ஆட்டநாயகனாக, 86 ஓட்டங்களையும் 1 விக்கெட்டினையும் வீழ்த்திய மிட்செல் மார்ஷ் தெரிவுசெய்யப்பட்டார்.